Psalms 78

1Hawu bantu bami, zwanini imfundiso yami; lalelani amazwi omlomo wami.

2Ngizavula umlomo wami ngemifanekiso, ngizakhuluma izinto ezifihlekileyo, izinto zekadeni –

3esakuzwayo lesikwaziyo esakutshelwa ngokhokho bethu.

4Kasizukuzifihlela abantwana babo; sizasitshela isizukulwana esizayo ngemisebenzi emangalisayo kaJehova, amandla akhe, lemimangaliso aseyenzile.

5UJakhobe wammisela imithetho wabeka umlayo ko-Israyeli, walaya okhokho bethu ukuthi bawufundise abantwababo,

6ukuze aziwe yisizukulwane esilandelayo, kanye labantwana abazazalwa, kuthi labo batshele abantwababo.

7Yikho-ke bazabeka ithemba labo kuNkulunkulu njalo abasoze bakhohlwa izenzo zakhe kodwa bagcine imilayo yakhe.

8Kabayikuba njengabokhokho babo ababeyisizukulwana esilobuqholo lesihlamukayo, ozinhliziyo zabo zazingathembekanga kuye.

9Amadoda ako-Efrayimi, loba ayehlomile ngemitshoko, afulathela mhla welanga lempi;

10kabasigcinanga isivumelwano sikaNkulunkulu, bala ukuphila ngomthetho wakhe.

11Bakhohlwa lokho ayekwenzile, izimanga ayebatshengise zona.

12Wenza imimangaliso oyise bekhangele elizweni laseGibhithe, esigodini saseZowani.

13Walwahlukanisa ulwandle wabahola bachapha; wenza amanzi ema aqina saka njengomduli.

14Wabahola ngeyezi emini njalo ngokukhanya komlilo ubusuku bonke.

15Wawaqhekeza amadwala enkangala wabapha amanzi amanengi njengolwandle;

16wantshazisa izimpophoma emadwaleni amawa wenza amanzi ageleza njengemifula.

17Kodwa baqhubeka besona phambi kwakhe, bamhlamukela enkangala yena oPhezukonke.

18Bamlinga uNkulunkulu ngabomo ngokucela ukudla ababekutshisekela.

19Bamchothoza uNkulunkulu besithi, “Kambe uNkulunkulu angendlala itafula lokudlela enkangala na?

20Wathi lapho etshaya idwala, amanzi antshantshaza, kwageleza amanzi amanengi. Kodwa angasipha njalo lokudla na? Angabalethela inyama abantu bakhe na?”

21UJehova wathi ebezwa wathukuthela kakhulu; umlilo wakhe wavuthela kuJakhobe, ulaka lwakhe lwaqina ku-Israyeli,

22ngokuba kabamkholwanga uNkulunkulu lokuthi kabathembanga amandla okukhulula kwakhe.

23Loba kunjalo walaya umkhathi ngaphezulu wavula iminyango yamazulu;

24wanisa imana ukuthi badle abantu, wabapha amabele asezulwini.

25Abantu badla isinkwa sezingilosi; wabathumela konke ukudla ababengakudla.

26Wawukhulula umoya wempumalanga uvela emazulwini, wawukhulula umoya weningizimu ngamandla akhe.

27Wanisela inyama kubo njengothuli, izinyoni eziphaphayo zaba njengetshebetshebe ogwini lolwandle.

28Wazenza zehlela phakathi kwezihonqo zabo, indawana yonke emathenteni abo.

29Bazitika baze bakhangela, ngokuba wayebaphe ababekade bekukhalela.

30Kodwa bengakakutshiyi lokhokudla ababekukhalela belokhu besakunambitha emilonyeni yabo,

31ulaka lukaNkulunkulu lwavutha kubo; wabulala zona iziqwabalanda zabo, wawahemula amajaha ako-Israyeli.

32Phezu kwakho konke lokhu baqhubeka besona; phezu kwezimanga zakhe, kabazange bakholwe.

33Ngakho wenza izinsuku zabo zaphelela ezeni njalo leminyaka yabo yagcwala ukwesaba.

34Kwakusithi uNkulunkulu angababulala, bamdinge; baphendukele kuye njalo ngokutshiseka.

35Bakhumbula ukuthi uNkulunkulu wayelidwala labo, ukuthi uNkulunkulu oPhezukonke wayenguMkhululi wabo.

36Kodwa-ke kwakuyikumyenga ngemilomo yabo, beqamba amanga kuye ngezindimi zabo;

37izinhliziyo zabo zazingabambelelanga kuye, babengathembekanga esivumelwaneni sakhe.

38Kodwa wayelesihawu; wazithethelela izono zabo kaze ababhubhisa. Isikhathi ngesikhathi waluthoba ulaka lwakhe akaze akuqubula konke ukuthukuthela kwakhe.

39Wakhumbula ukuthi babeyinyama nje intshongolo eyedlulayo nje ingabe isabuya.

40Kodwa ukuthi bamhlamukela kanengi njani enkangala, bamdabukisa egwaduleni!

41Baphindaphinda ukulinga uNkulunkulu; bamthukuthelisa oNgcwele ka-Israyeli.

42Kabawakhumbulanga amandla akhe usuku abakhulula ngalo kumcindezeli,

43usuku lapho aveza khona izibonakaliso zakhe ezimangalisayo eGibhithe, izimanga zakhe esigodini saseZowani.

44Waguqula imifula yabo yaba ligazi; behluleka ukunatha ezifuleni zabo.

45Wathumela imihlambi yezibawu zabantinya, lamaxoxo ababhuqayo.

46Amabele abo wawathela izintethe, izithelo zabo isikhongwane.

47Wathintitha amavini abo ngesiqhotho lemikhiwa yabo yesikhamore wayitshazisa ngongqwaqwane.

48Izinkomo zabo wazithela ngesiqhotho, izifuyo zabo zadliwa yizikhatha zombane.

49Wabathululela ulaka lwakhe oluvuthayo, intukuthelo yakhe, ukucunuka lenzondo ixuku lezingilosi ezibhubhisayo.

50Wayilungisa indlela yolaka lwakhe; kabaphephisanga ekufeni kodwa wabanikela emikhuhlaneni.

51Wawabulala wonke amazibulo aseGibhithe, izithelo zabo zokuqala zokuba ngamadoda emathenteni kaHamu.

52Kodwa wabakhupha abantu bakhe njengomhlambi wezimvu; wabahola njengezimvu bedabula inkangala.

53Wabakhokhela ngonanzelelo, ngakho babengesabi; kodwa ulwandle lwazigubuzela izitha zabo.

54Kanjalo wabaletha emngceleni welizwe lakhe elingcwele, elizweni lamaqaqa ayelithethe ngesandla sakhe sokunene.

55Wazixotsha izizwe phambi kwabo wabahlukanisela ilizwe lazo laba yilifa; wahlalisa izizwana zako-Israyeli emizini yazo.

56Kodwa bamlinga uNkulunkulu bamhlamukela oPhezukonke; kabayigcinanga imiyalo yakhe.

57Njengabokhokho babo babengathembekanga bengakholwa, ungeke wathemba njengedandili elenziwe kubi.

58Bamvusa ulaka ngezindawo zabo eziphezulu; baqubula ubukhwele bakhe ngezithombe zabo.

59Wathi uNkulunkulu ngokukuzwa lokho, wathukuthela kakhulu; wamlahla qobo lokumlahla u-Israyeli.

60Walidela ithabanikeli lakhe eShilo, ithente ayelakhile phakathi kwabantu.

61Umphongolo wakhe wamandla wawusa ekuthunjweni, inkazimulo yakhe ezandleni zesitha.

62Abantu bakhe wabanikela ukudliwa yinkemba; wayethukuthele kakhulu ngelifa lakhe.

63Umlilo waziqeda izinsizwa zabo, izintombi zabo zaswela izingoma zomtshado;

64abaphristi babo babulawa ngenkemba, abafelokazi babo behluleka ukulila.

65Kwathi-ke uJehova waphaphama kungathi usebuthongweni, njengomuntu ephaphama ekudakweni yiwayini.

66Wazitshaya zahlehla izitha zakhe; waziyangisa okungapheliyo.

67Khonapho-ke wawakhalala amathente kaJosefa, akaze asikhetha isizwana sika-Efrayimi;

68kodwa wakhetha isizwana sikaJuda, iNtaba iZiyoni ayeyithanda.

69Wakha indlu yakhe engcwele njengeziqongo, njengomhlaba awumisela ingunaphakade.

70Wakhetha uDavida inceku yakhe wamthatha ezilugwini zezimvu;

71wamsusa ekwaluseni izimvu wamletha ukuba ngumalusi wabantu bakhe uJakhobe, baka-Israyeli ilifa lakhe.

72Njalo uDavida wabelusa ngobuqotho benhliziyo; wabakhokhela ngesandla sobungcitshi.